91�ε�

Yaponiyanın Xarici İşlər Nazirliyi Azərbaycan da daxil olmaqla bir sıra Avropa ölkələrindən olan gənclər üçün 2026-cı il “MIRAI – qısamüddətli Yaponiya Mübadilə Proqramı” üzrə müraciət qəbulunu elan edir. Proqram 20–30 yaş aralığında olan bakalavr və magistratura tələbələrinin, eləcə də işləyən gənclərin Yaponiya haqqında bilik və anlayışlarının artırılmasına yönəlib.

2015-ci ildən etibarən həyata keçirilən “MIRAI” proqramının əsas məqsədi Yaponiya ilə dünyanın müxtəlif ölkələrinin nümayəndələri arasında qarşılıqlı mübadiləni təşviq etmək, iştirakçıların Yaponiyanın iqtisadiyyatı, cəmiyyəti, tarixi, mədəniyyəti və diplomatik əlaqələri haqqında biliklərini genişləndirməkdir.

Proqramın mövzusu

2026-cı ildə Azərbaycandan olan iştirakçılar üçün proqramın mövzusu “Süni intellekt startapları” olacaq.

Proqram çərçivəsində:

• Yaponiyanın aparıcı universitetlərində mövzu üzrə mühazirələr;
• yapon tələbələrlə müzakirələr;
• təhsil və tədqiqat müəssisələrinə səfərlər;
• müvafiq müəssisələrin nümayəndələri ilə fikir mübadiləsi;
• Yaponiyanın tarixi və mədəniyyəti ilə tanışlıq məqsədilə regionlara səfərlər nəzərdə tutulur.

Proqramın ilkin mərhələsində 2026-cı ilin noyabr ayında onlayn hazırlıq proqramının, daha sonra səfəröncəsi oriyentasiyanın keçirilməsi planlaşdırılır. Yaponiyaya səfər 1–7 dekabr 2026-cı il tarixlərində baş tutacaq. Proqram tamamilə ingilis dilində keçiriləcək.

Kimlər müraciət edə bilər?

Proqrama:

• Azərbaycandakı universitetlərdə mühəndislik və informasiya texnologiyaları ilə əlaqəli sahələr üzrə təhsil alan bakalavr və magistratura tələbələri;
• İT mütəxəssisi və ya sahibkar kimi fəaliyyət göstərən 20–30 yaş arası gənclər müraciət edə bilərlər.

Namizədlərin ingilis dilində sərbəst müzakirə aparmaq bacarığına və yüksək akademik göstəricilərə malik olmaları tələb olunur.

Qeyd: Yaponiyada 6 ay və ya daha uzun müddət yaşamış, həmçinin daha əvvəl “MIRAI” proqramı və ya Yaponiya hökumətinin digər təqaüd proqramları çərçivəsində Yaponiyaya səfər etmiş şəxslər proqrama müraciət edə bilməzlər.

Proqram tərəfindən qarşılanan xərclər

Proqram çərçivəsində iştirakçıların Yaponiyaya gediş-dönüş aviabileti, səyahət sığortası, Yaponiyada qalma, ölkədaxili nəqliyyat və yemək xərcləri, həmçinin muzey və digər obyektlərə giriş haqları qarşılanır.

Müraciət qaydası və son tarix

Namizədlər əvvəlcə proqramın rəsmi müraciət təlimatı ilə tanış olmalı, daha sonra xüsusi elektron müraciət forması vasitəsilə sənədlərini təqdim etməlidirlər. Müraciət zamanı motivasiya məktubu, pasportun surəti, akademik transkript, razılıq sənədi və digər tələb olunan məlumat və sənədlərin təqdim edilməsi nəzərdə tutulur.

Müraciət üçün son tarix: 31 avqust 2026-cı il, Bakı vaxtı ilə saat 05:00-dək.

Seçim nəticələrinin 14 oktyabr 2026-cı il tarixində namizədlərə bildirilməsi nəzərdə tutulur.

Ətraflı məlumat və müraciət qaydaları ilə Yaponiyanın Azərbaycan Respublikasındakı Səfirliyinin rəsmi internet səhifəsində tanış olmaq mümkündür: